O 7 de xullo de 2023 tivo lugar o pleno extraordinario para a aprobación do regulamento de organización, funcionamento e réxime xurídico.
Dos 13 concelleiros elixidos democraticamente o pasado 28 de maio, presentáronse 12.
Na orde do día estaba prevista a renuncia por incompatibilidade dunha concelleira do grupo municipal do PSOE. Polo tanto, as votacións poderían estar alteradas e a concelleira de Primeiro Ortigueira pediu que os temas referidos a remuneracións e indemnizacións se realizasen no seguinte pleno, unha vez presentes os 13 concelleiros e concelleiras. Esta proposta foi rexeitada cos votos do grupo de goberno de PP e XA.
Un dos primeiros puntos a tratar era a celebración dos plenos municipais. Estes, celebraranse na última semana dos meses impares ás 20:00h. Punto aprobado por unanimidade.
A proposta do BNG foi que se celebren os venres para favorecer a asistencia e participación e que se inclúa nos plenos a posibilidade de participación da veciñanza e/ou das asociacións, que poidan participar e preguntar ao final das sesións, tal e como se recolle na Lei que regula o funcionamento das entidades locais.
En canto ás remuneracións, saíu adiante a aprobación de dúas parciais do 40% de dedicación (14h) e unha persoa como asesora-secretaria persoal do Alcalde.
A nosa postura, seguindo o que levabamos no noso programa, era a redución de gastos na corporación municipal. Co presentado, a redución é mínima, polo tanto, optouse por votar en contra.
Con todo, consideramos que hai que dignificar o traballo político e que non se cobra só polas horas adicadas, senón tamén pola responsabilidade que conleva ocupar ese posto.
En definitiva, propuxemos unha redución no coste destas dedicacións (perto dos 30.000€ as dúas máis a asesora-secretaria).
Indemnizacións por asistencia aos plenos.
De novo, observamos como, en vez de reducir os gastos ou mantelos, decídese por 6 votos a favor de PP e XA que os plenos (en meses impares) sexan 150€, as comisións (en meses impares) 100€ e as xuntas de goberno (1 semanal) 100€. Inclúese a creación dunha xunta de portavoces, bimensual e 100€ por cada unha.
Consideramos que as cantidades, a final de mes e ano, son esaxeradas e pedimos que se reduzan. Alén diso, no caso de haber 4 sesións de xunta de goberno, por coherencia co que propoñían, transparencia e información á oposición faise necesaria e urxente a creación da Xunta de Portavoces.
O noso voto foi en contra da proposta.
O punto 7, delegación de competencias plenarias na Xunta de Goberno Local (XGL), saíu adiante grazas aos votos a favor de PP-XA (6). Isto significa que en 2023 votaron a favor de algo que levaban votando en contra noutras ocasións, que non é outra cousa que quitarlle competencias ao pleno para darlla á XGL e que a oposición (en maioría: BNG 1, PSOE 4, PO 2) non teña voto sobre decisións de certa relevancia para o noso municipio.
Creación dos grupos Municipais e participación nas comisións. O BNG pasa ao grupo mixto por non obter os 2 escanos que lle darían a posibilidade para constituírse como grupo municipal independente. Créanse dúas comisións nas que haberá 3 representantes do PP, 2 do PSOE, 1 de PO e un do Grupo Mixto, formado polo BNG e XaT.
No grupo mixto sae como voceiro o portavoz do BNG, Marco Schaal , e como suplente, a portavoz de XA, Isabel Rego. Terán turno de palabra ambos. Nestas comisións os turnos serán rotatorios entre ambas formacións e poden estar presentes en todas elas.
No tema da persoa asesora-secretaria para o Alcalde a nosa postura podería ser favorábel, entendendo que teña a alguén que o asesore para unha persoa que entra como novata na alcaldía. Mais, analizando as funcións que se lle outorgan, entendemos que non a podemos aceptar, xa que son funcións dunha secretaría persoal nas que se inclúen atención telefónica, axenda institucional ou atención de oficina á cidadanía, entre outras.
