O BNG de Ortigueira denuncia, unha vez máis, a falta de planificación e previsión do goberno municipal da coalición PP-XA, que levou á perda de máis de 30.000 euros en subvencións, afectando investimentos clave para o municipio.

1. Perda de 33.212,08 euros para a instalación de iluminación LED en instalacións deportivas, ao non executarse o proxecto no prazo establecido.

2. Devolución de 418,12 euros dunha subvención do programa RISGA, pola incapacidade do Concello para xustificar correctamente os fondos destinados á contratación de persoas en risco de exclusión social.

  En total, 33.630,20 euros devoltos á Xunta de Galiza por falta de previsión e mala xestión.

Un goberno que perde financiamento por falta de previsión

 A subvención para iluminación LED foi concedida pola Xunta cunha achega total de 41.515,10 euros, dos cales o Concello recibiu un anticipo do 80 % (33.212,08 euros). O proxecto non se executou debido aos incumprimentos da empresa contratada, pero o goberno municipal esperou ata novembro para pedir unha prórroga, cando xa era evidente que os prazos non se cumprirían e era necesario xustificalos a finais de novembro. A falta de resposta por parte da Xunta do PP non exime de responsabilidade ao Concello, que tiña a obriga de anticiparse a este problema e garantir a execución da obra.

 No caso da subvención da RISGA, concedida para contratar persoas en risco de exclusión social, o Concello tampouco foi quen de xustificar correctamente os gastos, o que obrigou a devolver 418,12 euros á administración autonómica.

Ortigueira non pode seguir perdendo recursos por mala xestión

 A coalición PP-XA está a demostrar unha forma de gobernar baseada na improvisación, a falta de planificación e a ausencia de control sobre os proxectos financiados con fondos públicos. Mentres outros concellos aproveitan as axudas para mellorar infraestruturas e servizos, en Ortigueira pérdense subvencións por falta de xestión, e mesmo se devolven fondos que deberían beneficiar á veciñanza.

 O BNG propón un modelo de goberno baseado na planificación, no seguimento rigoroso dos proxectos e na defensa dos intereses do Concello fronte á Xunta, para que ningún recurso se perda por desorganización ou falta de previsión.

 Por todo isto, pediremos explicacións ao goberno municipal de PP-XA e medidas urxentes para que esta situación non se repita. Ortigueira non pode permitirse seguir perdendo financiamento por mala xestión.